ಏ ಜೆಜುಚ್ಯಾ ಬೋವ್ ಪವಿತ್ರ್ ಕಾಳ್ಜಾ, ಘಾಲ್ ತುಜಿಂ ವಿಂಚ್ಣಾರ್ ಆಶೀರ್ವಾದಾಂ ಆಮ್ಚ್ಯಾ ಫಿರ್ಗಜ್ ಕುಟ್ಮಾಚೆರ್. ಪಾಟ್ಲ್ಯಾ ಅಯ್ಶಿಂ ದೋನ್ ವರ್ಸಾಂ ಥಾವ್ನ್ ತುಕಾ ಸಮರ್ಪಿಲ್ಲ್ಯಾ ದೇವ್ ಮಂದಿರಾಂತ್ ತುಜಿ ಸ್ತುತಿ ಆನಿ ಆರಾಧಾನ್ ಕರುಂಕ್ ಆಮ್ಕಾಂ ಫಾವೊ ಕೆಲಾಂಯ್. ಹ್ಯಾ ಪಾಸತ್ ಆಮಿ ತುಕಾ ಅರ್ಗಾಂ ದಿತಾಂವ್. ತುಜ್ಯಾ ಪವಿತ್ರ್ ಅತ್ಮ್ಯಾಕ್ ಧಾಡುನ್ ಆಮ್ಚೆಂ ಫಿರ್ಗಜ್ ಕುಟಾಮ್ ಪವಿತ್ರ್ ಕರ್. ಎಕಾಮೆಕಾಚಿ ಸೆವಾ ಚಾಕ್ರಿ ಕರ್ನ್, ಮೊಗಾನ್ ಆನಿ ಭಾವ್-ಭಾಂಧಾವ್ಪಣಾನ್ ಜಿಯೆಂವ್ಕ್ ಆಮ್ಕಾಂ ಆಧಾರ್ ದಿ. ಪ್ರತ್ಯೇಕ್ ರಿತಿನ್ ಆಮ್ಚ್ಯಾ ಯುವಜಣಾಂಕ್ ಬರೊ ಫುಡಾರ್ ಆನಿ ಬರಿ ಸೈರಿಕ್ ಫಾವೊ ಕರ್. ಆಮ್ಚ್ಯಾ ಭುರ್ಗ್ಯಾಂನಿ, ಯುವಜಣಾಂನಿ, ಆವಯ್ ಬಾಪಾಯ್ನಿಂ, ಉತರ್ ಪ್ರಾಯೆಕ್ ಪಾವ್ಲೆಲ್ಯಾಂನಿಂ ತುಜ್ಯಾ ಪವಿತ್ರ್ ಕಾಳ್ಜಾಚ್ಯಾ ಮೊವಾಳಾಯೆ ಪರಿಂ ಮೊವಾಳ್ ಜಾಂವ್ಕ್ ತುಜ್ಯಾ ಕುರ್ಪೆನ್ ಭರ್. 

"ಯೆಯಾತ್ ತುಮಿ ಸಮೆಸ್ತ್ ಕಷ್ಟಾತೆಲ್ಯಾಂನೊ ಆನಿ ವ್ಹಜನ್ ವಾವಾಯ್ತೆಲ್ಯಾಂನೊ, ಹಾಂವ್ ತುಮ್ಕಾಂ ವಿಶೆವ್ ದಿತಲೊಂ". ಹ್ಯಾ ತುಜ್ಯಾ ಉತ್ರಾಚೆರ್ ಭರ್ವಸೊ ದವರ್ನ್ ಆಮ್ಚೆ ಕಷ್ಟ್, ದೂಖ್, ಖಂತ್, ಬೆಜಾರಾಯ್, ಆಮ್ಚೆಂ ಕುಟಾಮ್, ಆಮ್ಚೆಂ ಕಾಮ್ ತಶೆಂಚ್ ಜಿವಿತಾಚಿ ಹರ್ ಏಕ್ ಘಡಿ ತುಜ್ಯಾ ಪವಿತ್ರ್ ಹಾತಾಂತ್ ಸಮರ್ಪಿತಾಂವ್. ಹಿ ಹರ್ ಏಕ್ ಘಡಿ ಸುಖಾ ಸಂತೊಸಾನ್, ಶಾಂತಿ ಸಮಾಧಾನೆನ್ ಪರಿವರ್ತನ್ ಕರ್. ಆಮ್ಚ್ಯಾ ಜಿವಿತಾಚೆ ಹರ್ ಏಕ್ ಖುರಿಸ್ ಖುಶೆನ್ ಸ್ವೀಕಾರ್ ಕರ್ನ್ ತೆ ವಾವಂವ್ಕ್ ಆಮ್ಕಾಂ ತುಜ್ಯಾ ಬೆಸಾಂವಾನಿ ಭರ್. ಆಮ್ಚ್ಯಾ ಫಿರ್ಗಜೆಚ್ಯಾ ಕುಟ್ಮಾಂನಿ ಆಸ್ಚ್ಯೊ ವಾ ಉದೆಂವ್ಚ್ಯೊ ಸರ್ವ್ ವಾಯ್ಟ್ ಸಂಗ್ತಿ ತುಂ ಕಾಡುನ್ ಉಡಯ್. ತುಜ್ಯಾ ಪವಿತ್ರ್ ಕಾಳ್ಜಾಚ್ಯಾ ಜಾಣ್ವಾಯೆನ್ ಕುಟ್ಮಾಂತ್ ಜಿಯೆಂವ್ಚ್ಯಾ ಮ್ಹನ್ಶಾಂಚಿ ಮ್ಹನಾಂ ಉಜ್ವಾಡಾಯ್. 

ಆಮ್ಚ್ಯಾ ಫಿರ್ಗಜೆಂತ್ ಆಮ್ಚ್ಯಾ ಉದರ್ಗತೆ ಖಾತಿರ್ ಖಳನಾಸ್ತಾನಾ ನಿಸ್ವಾರ್ಥ್ಪಣಿ ಪಾಟ್ಲ್ಯಾ ವರ್ಸಾಂನಿ ಗೊವ್ಳಿಕ್ ವಾವ್ರ್ ಚಲವ್ನ್ ವೆಲ್ಲ್ಯಾ, ತಶೆಂಚ್ ಆತಾಂ ಗೊವ್ಳಿಕ್ ವಾವ್ರ್ ಕರ್ಚ್ಯಾ ಆನಿ ಕರುಂಕ್ ಆಸ್ಚ್ಯಾ ಸರ್ವ್ ತುಜ್ಯಾ ಮಣಿಯರ‍್ಯಾಂಕ್ ತುಜ್ಯಾ ಪವಿತ್ರ್ ಅತ್ಮ್ಯಾನ್ ಭರ್.

ಆಮ್ಚ್ಯಾ ಫಿರ್ಗಜೆಂತ್ ಮುಕ್ಲಿ ಅಭಿವ್ರದ್ದಿ ಜಾಂವ್ಚ್ಯಾಕ್ ಏಕ್ ಕೊವೆಂತ್ ಆನಿ ಏಕ್ ಶಿಕ್ಪಾ ಸಂಸ್ಥೊ ಆಸಾ ಕರ್. ತ್ಯಾ ವರ್ವಿಂ ಹ್ಯಾ ಫಿರ್ಗಜೆಚೆಂ ಆರ್ಥಿಕ್, ಸಾಮಾಜಿಕ್, ರಾಜಕೀಯ್, ಶೈಕ್ಷಣಿಕ್, ಆತ್ಮಿಕ್ ವಾಡಾವಳ್ ಜಾವ್ನ್ ಸರ್ವಾಂನಿ ಮಾಯೆಮೊಗಾನ್ ಜಿಯೆಂವ್ಚ್ಯಾಕ್ ತುಜೊ ಆಧಾರ್ ಆಮಿ ಮಾಗ್ತಾನಾ ಏಕ್ ಫಿರ್ಗಜ್ ಕುಟಾಮ್ ಜಾವ್ನ್ ಹಿ ಆಮ್ಚಿ ಖಾಲ್ತಿ ವಿನಂತಿ ತುಕಾ ಭೆಟಯ್ತಾಂವ್. 

ಜೆಜುಚ್ಯಾ ಬೋವ್ ಪವಿತ್ರ್ ಕಾಳ್ಜಾ - ಆಮ್ಚಿ ಕಾಕುಳ್ತ್ ಕರ್.

ಮರಿಯೆ ಅಪೊಸ್ತಾಲಾಂಚೆ ರಾಣಿಯೆ - ಆಮಾ ಪಾಸತ್ ವಿನತಿ ಕರ್.

ಸಾಂ. ವಿಶೆಂತ್ ಪಾಲ್ಲೊಟ್ಟಿ - ಆಮಾ ಪಾಸತ್ ವಿನತಿ ಕರ್.